okumma

by Wolfgang Mai

/
  • Streaming + Download

    Includes unlimited streaming via the free Bandcamp app, plus high-quality download in MP3, FLAC and more.

      €12 EUR  or more

     

  • Full Digital Discography

    Get all 6 Wolfgang Mai releases available on Bandcamp and save 25%.

    Includes unlimited streaming via the free Bandcamp app, plus high-quality downloads of okumma, Main Street, A World Away, Tuesdays, Holiday On Mars, and Right Time, Right Place. , and , .

      €27.75 EUR or more (25% OFF)

     

1.
2.
3.
4.
04:44
5.
6.
7.
8.
04:48
9.
04:12
10.
11.
12.
07:16
13.
14.
15.

about

Dies ist das erste Album von Wolfgang, das in deutscher Sprache erscheint. Um genauer zu sein: in fränkischer Mundart, der Sprache, mit der Wolfgang aufgewachsen ist und an die er sich wieder erinnert hat. Und mit ihr an viele Ereignisse, die sich im Prozess des "Ankommens" (okumma) oder Auftauchens dem Bewusstsein wieder zugänglich gezeigt haben...

credits

released May 1, 2015

tags

license

all rights reserved

about

Wolfgang Mai Erlangen, Germany

Wolfgang Mai is a singer/songwriter, who lives in Erlangen/Germany. He has no band, but loves writing and producing music. Each song is written on guitar and then arranged and recorded with the help of software and loops. Vocals and most guitars are recorded by himself. The result of these efforts? Wolfgang Mai: "If I had a band to play these songs with me, that's what I wish it would sound like." ... more

contact / help

Contact Wolfgang Mai

Streaming and
Download help

Track Name: Kehr vor dahner eichnan Dür
Kehr vor daner eichnan Dür Text und Musik: Wolfgang Mai


Bevors di mid mer oleegsd, kehr vor daner eichnan Dür
Bevors di mid mer streidsd, kehr vor daner eichnan Dür
Wall es kennerd ja sei, dassd falsch liggsd
Un dä schwaze Beeder lichd bei dir

Bevors di mid mer zoffsd, gnibbs dei Hirn o, reiß di zamm
Bevors di mid mer kabblsd, schald deini Sünabsn amoll auf Embfang
Wall wosd gsachd hosd kennerd der leid du
Nocherd schdehsd gans schee debberd do

Bevorsd mimm Finger auf miech zeigsd, geh numoll an Schridd zurügg
Bevorsd mimm Finger auf miech deidsd, holl erschdmol Lufd, hald diech zurügg
Wall vo di fümf Finger on deiner Händ
zeing wenigsdns drai auf diech zurügg

Wos gsachd is, is gsachd, dess fängsd du nimmer ei
Wos gsachd is, is draußn, dess holsd du niemols mehr rei
Drumm hald dei Schlebbern, wennsd dä ned sichä bisd
Mer schiesd so schnell om Ziel vobai

Bevorsd ieber mier den Stoob brichsd, schau selbä erschd in Spiechl nei
Bevorsd mer genüßlich ahns auswischd, schau selbä erschd in Spiechl nei
Bass obachd, leichd kommer danehm lieng
Schnell konnsd du dä Glaggmeierde sei

Du wassd ers doch a: Redn is Silbä und Schweing Gold
Wassd du dess ned? Redn is Silbä und Schweing Gold
Sai gschaid, hald dei vorlauda Babbm
Wall ahn sowieso irchndwann alles eiholld

Bevors di mid mer oleegsd, kehr vor daner eichnan Dür
Bevors di mid mer streidsd, kehr vor daner eichnan Dür
Wall es kennerd ja sei, dassd falsch liggsd
Un dä schwaze Beeder lichd bei dir
Track Name: Middn im Leem
Middn im Lebm Text und Musik: Wolfgang Mai



Di Sunna scheind zum Fensder nei
Di erschdn Veechli dennan zwidschern
Di Nachd schlaich siech davo gans schdill
Iech häng meini Gedangn nooch, giess mer nu an Kaffee ei
Kernggloggn, dann is widder a Ruh
Iech schliess di Aung, s‘iss wie im Draum
Iech sauch nann auf, den Auchnbligg
Wer waas, vielleichd kummd der nie zurügg

Iech mach di Dür auf und geh naus
Stabf durchn Schnee nieber zum Schubbn
Leech a boar Holzscheid nei in Korb
Iech holl dief Lufd, die rieng so guud, dann kummds mer in Sinn
Iech spiehr: wos fier a Glügg hobb iech im Lebm
Bin geborng, hobbs warm drods dera Käld
Iech sauch nann auf, den Auchnbligg
Wer waas, vielleichd kummd der nie zurügg

Iech leech a Scheidla nei ins Feier
Ess gnisderd, flaggerd, wärmd so schee
Sedds miech on Disch, schau naus, deng nooch, spier middn im Lebm
A unendlicha Diefn
Wos gesdern woar, is heid vorbai
Wos morng is, sooch, wer konn dess scho wissn
Iech sauch nann auf, den Auchnbligg
Wall iech waas, der kummd nie zurügg
A korzer Wimbernschloch dä Zeid
Im Auchnbligg di Ewichkeid
Track Name: A jeder brauchd an Hofnarrn
A jeder brauchd an Hofnarrn Text und Musik: Wolfgang Mai


Iech bin wichdi, iech bin schlau, schee sowieso
Iech waas fasd alles, kenn an jedn, steh ieberall mein Mo
Hobb mai Leem in dä Händ, alles fesd im Griff
No frochsd du wies mer gehd auf meim singnda Schiff

Woss Gschaiders wie miech, do konnsd lang danooch suhng
Mai ausgsuchda Exberdiesn derfsd fier daiers Geld buhng
Alla hängans on meini Libbm, no kummsd du und iech griech vo dä gsachd:
Midd dier hamms widder amoll denn Bogg zum Gäddner gmachd

A jedä brauchd an Hofnarrn
Derm Bogg di Schelln umhängd
A jedä brauchd sein Hofnarrn
Der siech ned blendn lässd un sachd wosser dengd

Mai edler Boddy iss gschdähld, mai Haud gladd un schdraff
Alla himmelns miech o, bin hald doch der Schennsde im Kaff
No kummsd du un saggsd mers gladd ins Gsichd nai
Du alder, eidler Goggl, dai Zeid iss lang scho verbai

A jeder konn sehng, a jeder konn spiern
Iech bin a Kämbfer, a Siecherdübb, konn gorned verliern
Alla kuschns, duggn, huldichn mer, jubeln mer zu
Bloß du lachsd miech aus, saggsd, du Debb, loss mer mai Ruh

A jedä brauchd an Hofnarrn
Derm Bogg di Schelln umhängd
A jedä brauchd sein Hofnarrn
der dess Blendn ara Blendn nennd

Wier a Pfau schdolzier iech durchs Leem, schlooch ieberall mai Rad
A edler Held, ess Gschaiderla, a endschlossner Moo der Dad
A jeder suchd di Erleuchdung under meim Heilichnschah
Bloß du zaichsd mer an Vochl un schdelldsd mer a Baa

A jeder will wissn, wie iech zu nan schdeh
Ob iech mein Dauma fier na nooch ohm odder undn dreh
A guuds Wodd vo mier iss wie a donnernder Abblaus
Doch du ziegsd Grimassn, lachsd schallend grodnaus

A jedä brauchd an Hofnarrn
Derm Bogg di Schelln umhängd
A jedä brauchd sein Hofnarrn
Der siech um nix in dä Weld verrengd

Wie die Lufd zum Schnaufn brauchd mer öfder ahna vo ahm eigschengd
Der siech genau Null do drum schehrd, woss mer vo nann dengd
Ess dudd guud, wenns di amoll vo deim hoa Ross haud
Dann hogg mer alla zwaa om Bodn und lachn laud

A jedä brauchd an Hofnarrn
Der ahm di Wohrheid geichd
A jedä brauchd an Hofnarrn
Der si ned blendn lässd un sachd wosser dengd
Track Name: Schbroochlos
Schbroochlos Text und Musik: Wolfgang Mai

Weecher mier mussd du diech ned verschdeggn
Bei mier derfsd du sei wiesd bisd
Bei mier konnsd du gor ned oneggn
Wall iech diech midd Eggn un Kandn genau so mooch wiesd bisd

Mussd ka Angsd hoom, dass iech diech ned ernsd nehm
Koonsd wennsd moggsd genau dess soogn wos du dengsd
Mussd mer nix vorspilln odder diech schee omooln
Wall du bist fier miech so schee wiesd ehm bisd

Iech frooch miech: womidd hob iech diech verdiend?

Geh ner her, iech will diech gans fest haldn,
Konn wärma, wenns di widder amoll frierd
Wennsd zweiflsd und ned wassd, wo der der Kobf stehd
Dann konnsd mid mer redn odder schweing - ganz wiesd willsd

Iech versprech der, dass iech ned weggrenn,
Wenns amoll hadd auf hadd kummd
Iech bleib steh, wenn der dä Wind kald ins Gsichd weehd
Schbann an Schermer auf, schdell miech nai in Wind bis widder gehd

Iech frooch miech: womidd hob iech diech verdiend?

A jeder gehd allaa durch sei Leebm
Woss dusdd odder ned, dess liechd gans on Dier
Kaaner konn ahm die Richdung vorgebm
Obber wennsd willsd, dann bleib iech auf deim Weech noh neber Dier

Du bisd fier miech alles im Lebm
Dei Grafd und Scheenheid ziehng miech magisch o
Fier miech bisd du di Fraa in meim Lebm
Einmolich, einzichardich, scho glei gorned ausdauschbor

Iech frooch miech: womidd hob iech diech verdiend?

Manchmool do dengg iech, wie konn dess blos sei
Dass du grood miech ausgwähld hosd
Ausgrechnd miech mid olla meini Maggn
Dess machd miech sprochlos und dangbor a nooch all di Johr
Track Name: Irchndwie, irchndwo, irchndwann
Irchndwie, irchndwo, irchndwann Text und Musik: Wolfgang Mai


Ess reengd in Ströma
Iech steh on deim Grob, allaans und waan
All di scheenan Stundn
Vill verbassde Chancen obber a

Iech schließ di Aung - draam miech davo
Loss all's lieng und steh - und beam miech ganz weid wech
Reis bis ans End vo der Weld - und nu vill weider
Der Dooch, der kummd - wo alles andersch werd

Hobbs immer guud gmahnd
Ofd bloß ess Gechndeil erreichd
In bessder Absichd
Doch widder alles voll vergeichd

Iech schließ di Aung - draam miech davo
Loss all's lieng und steh - und beam miech ganz weid wech
Reis bis ans End vo der Weld - und nu vill weider
Der Dooch, der kummd - irchndwie, irchndwann

Iech waas ned wo dess iss, scho gorned wann
Nu vill wenicher, wie dess ieberhaubd sei konn
A nais Universum, a naier Stern
Wo alle Scherbm widder zammbabbd werrn

Wolld nie ahm wehdu
Scho gorned dennern, die iech mooch
Meecherd gern a Segn sei
Und bin doch vill zu ofd a Blooch

Iech schließ di Aung - draam miech davo
Loss all's lieng und steh - und beam miech ganz weid wech
Reis bis ans End vo der Weld - und nu vill weider
Der Dooch, der kummd - wo alls verwandld werd
Der Dooch, der kummd - nix werd seiso wie's amoll wor
Der Dooch, der kummd - wo dess Verbohngna grodzohng werd



Fier mein aldn Freind, den Thomas, mein Freggi
Erlangen, 15.4.2014
Track Name: Iech, iech, iech
Iech, iech, iech Text und Musik: Wolfgang Mai


Alla dengn nur on siech, blos iech deng on miech
Woss is dess fer a bleede Weld, egoisdisch, kald un fies
A jeder schaud dass er siech nooch seiner Deggn streggt
Wos kümmern do die Anderen, die stengern blos im Weech

Du maansd wies a so is die Weld
Haubdsach du bisd besser gschdelld
Wos kümmern Diech die andern Leid
Haubdsach du hosd wos diech freid

A jeder rennd unendweechd seim Vordeil hinderher
Schaud ned lings und schaud ned rechds, wie's grod bassd und kreuzerquer
Änderd schdändich seine Meinung, häld sei Fähnla nei in Wind
Wie's grod bassd und wies grod nüdzd, fer dess, woss wergli nooddudd blind

Wenn nocherd doch amoll es Gwissn beissd
Sachd mer siech, des gehd verbei
Im Grund do is des Gwissn schlechd
Des homs der eibleid, des is ned echd

Wos gängern miech die Andern o, woss kimmerd diech des Gschrai?
Die Andern sin die Andern, Haubdsach mer is vorn dabai
Doch wennsd so dengsd konn's der bassiern, dassd auf dai Goschn fällsd
Wallsd vergissd, dassd für die Andern a blos a Andrer bisd

Du maansd wies a so is die Weld
Haubdsach du bisd besser gschdelld
Wos kümmern do die andern Leid
Haubdsach du hosd wos diech freid

Slebsdverliebdes Gschmarri hodd miech scho immer gschaffd
Kaaner dengd dodro dass mer ganz allans verrazd wär und verkaafd
So guud wie nix von dem, wovon mer lebd, hodd mer a selber gmachd
Immer hodd a Anderer dro gwergld, fier ahn mieddachd

Wennsd dann doch mol a andern brauchsd wersd sehng
fier die andern bisd a anderer, die lossns diech lings lieng

Du stehsd vorm Spiegel, lachsd diech o, und bisd ganz verzüggt
Mein lieber Schwan, wos bin iech schee, bisd ganz in diech verlibbd
Doch vo deim bleeden Spiegelgsichd griegst du nix zurügg
Du glodzd diech doch blos selber o, vom echdn Lebm siggsd du ka Stügg

Du maansd wies a so is die Weld
Haubdsach du bisd besser gschdelld
Wos kümmern do die andern Leid
Haubdsach du Debb hosd wos diech freid
Track Name: A glaans Zibferla vom Glügg
A glaans Zibferla vom Glügg Text und Musik: Wolfgang Mai


Ess Leem, a Lichdblitz nur
Unbarmherzich diggd die Uhr
Schdändier Weddlauf mid dä Zeid, doodgeweihd
Di kurza Zeid im Lichd
Vollgschdobfd, zammagschdauchd, brall, dichd
A Feierwerg, laud, schrill un grell
Bevor dä Vorhang fälld
Wossd hosd, dess wers'd verliern
Wers'd bissd, dess bleibsd fer immer
Leib, Hab un Guud verfalln
Woss'd aus der gmachd hossd: nie und nimmer
Wer bin iech? Wer will iech sei? - Sooch, wer froochd scho do danooch?
Fassadn dä Geschäfdichkeid
Verdeggn Angsd, Sinnlosichkeid
Gschafdlhubern, ledsdlich bisd
In am saumäßi schlechdn Film Schdadist

Wiera Blumma rosch verblühd
A Schdernschnubbn schnell verglühd
Davor, danooch gähneda Leer, Nachd, Dunglheid - weid un breid
Bedaibung bermanend, doddal. Rundum
Grindsd roddsfrech a Vakuum
Drum jo ka Zeid verliern
Bevor ess Lichd ausgehd
Mach dä nedd sovill Sorng
Wersd bisd, bleibd doch geborng
Frooch nedd, woss'd vo woss hossd
Frooch di wersd bisd, wenns ders dann hossd
Woss nedd wergli wichti iss, loss eimfach liehng, vergeh' fer immer
"Mai Haus, mei Audo und mei Bood"
Bleeda Sprüch vo Seeln in Nood
Alles hossd, doch ledsdlich bisd
Im Schmierndheoder der Schdadist

Wossd hossd, wersd zwor verliern
Dafier bleibd wersd bissd fer immer
Weld un Geld zerfalln
Woss'd aus der gmachd hossd: nie und nimmer
Drumm fohr di Erndn ei, dreh di nedd um, schau nedd aufs gmahda Feld zurügg
In deinä Scheina drinn siggsd dann
Vom großn Himml dei glaans Stügg
Nocherd häldsders in dä Händ:
A glaans Zibferla vom Glügg
Track Name: Weecher Dier
Weecher Dier Text und Musik: Wolfgang Mai



Iech hogg auf am Stuhl underm Abflbaam
Du gniesd lächelnd neber mier
Di Sunna scheint, die Lufd is warm
Dei Scherzer, der stehd Dier
Du lächlsd miech o und bisd ganz stolz
auf den glaan Buum mid seini roden Bäggli
Iech fiehl miech guud und so geborng
A heid nu, weecher Dier

Mid meim Bruder bin iech amoll vo dahamm abghaud,
Mier ham Zoff mid di Eldern ghobt
A halbe Weltreis im Bus vo ahner Stund hammer gmachd
Bis vor dei klabbrichs Gaddendührla
do host ned schlechd gschdaund, ober hosd di gfreid
a guds Wodd hosd fier uns eiglechd, uns die Schelln erspord
Iech fiehl miech guud und so geborng
Des drächd mi heid nu, weecher Dier

In der Kerng worsd immer hindn ghockt
Mer hodd di immer iebersehng
Ober wenn di Leid dann gsunga homm
Woarst ned zum Ieberhehrn
Su laud, ned grod schee, obber aus diefsder Seel
Des hodd mei Herz ogrierd
Wenn iech heid on an Godd glaab, ders guud mid uns mahnd
Dann vor allem weecher Dier

Dei Lehm wor a Blooch, voller Ärbert un Nood
Der Dood wor dei dreisder Begleider
Hosd gschrdrambelt, dassd deini siem Kinder durchbringsd
Ohne Mo, mid wenich Geld im Nochkriechselend
Dess wos des Lehm dir alles hiegworfm hod
Hosd ognumma, drodds Hoidern un Zweifln
A grumms Holz, ober a aufrechder Gang
Wos des hassd waas iech blos weecher Dier

Hosd alles gehm, hosd nix verlangd
Ka bees Wodd is ieber deini Libbm kumma
Wie gern deng iech an Diech, an den Abflbaam
An dein Gaddn in der Friehlingssunna
An deini Schneeballn, die Budderbrood mid Schniddlauch,
Di Pferdesuubbn, di Glees, Hoosen und Hiehner
Wenn miech anner froochd, wies Baradies ausschaud
Dann konn iech‘s ihm etz soong, weecher Dier
Wenn miech anner froochd, wies im Baradies ausschaud
Hobb iech Bilder im Kobf - weecher Dier
Track Name: A weng weng
A weng weng Text und Musik: Wolfgang Mai


Geld verspilln, blos nu chilln
Vom Erbe lebm, nix abgebm
Geld verbrassn, andre ärbern lossn
siech unverdrossn eimfach gea lossn
Aff die Seyschelln flieng, faul om Schdrand rumlieng
An sunnabrond grieng, nooch daierm Barfüm rieng,
Caipirinha schlabbern, mim Goldbestegg glabbern
Blos nu Leggereia gnabbern

Kaviar mid dä Schepfkelln fuddern
Lässich mid der Yacht rumduggern
Di Zeid doodschlohng, Dooch un Nachd
Na na, ka Angsd, blos a Späßla gmachd

Dess wär fei a weng weng
Mahnsd ned ar a weng weng
Horch amoll a weng weng
A scheens wengerla z'weng

Nie mehr raggern, blos nu bleed rumgaggern
Leid neidreibm, morngs lang liegn bleibm
In liebm Godd an gudn Mo sei lossn,
siech vo hind un vorn bediena lossn
Eimfach soong, woss aan im Kopf rumgehd
Siech ned drum schehrn, obs ahner falsch verschdehd
Debberd lachn zerr falschn Zeid
Laudhals schreia, wenns ahn freid

Bleed rumwaafn, wahllos Zeich eikaafn
Bleede Widds erzähln und dreggerd lachn
Wenns langwahli werd, siech di Bern zugnalln
Nix mehr schnalln, blos nu lalln

Jeds Geschäft vermasseln, grossgoscherd Säbl rasseln
In Gwinn versengn, ned on di Zukumfd dengn
Leid verscheing, in Ruin dreimb, Endwicklunga vergeing,
Obber immer widder fedda Abfindunga eistreing
Kollehng oschwärzn, wenns aufmuggn, ausmärzn
Scheena Redn haldn, Konkurrendn ausschaldn
Wenns nocherd zammahaldn, alla zammafaldn
Ja, so kommers guud aushaldn

Ummern Ärdboll jeddn, fremds Geld verweddn
Daire Anziech kaafn, auf rodm Debbich laafn
Wenns an der Börsn dann dein Kurs verreißn
Eimfach genuch Leid nausschmeissn
Track Name: Glabsdersnaa!
Glabsdersnaa Text und Musik: Wolfgang Mai
(Dinger gibbds, di gibbds ned)


Dass Geld di Weld regiern soll, dess gild scho lang ned mehr
Heid regiern Brogramme, gedrimmd auf immer schneller, immer mehr
Finanzgriech-Algorhydhma sin di naia di Herrn dä Weld
Di Geldgriechs-Generäle boodn wie Ongl Dagoberd im Geld

Während mier nu vornehm vendiliern, wie konnern dess bloß sei
Lachn die siech frech ins Feisdla, kibbn siech denn Schampus nai

Glabsdersnaa - Dinger gibbds, di gibbds ned
Glabsdersnaa - dess wennsd heersd, dess baggsd ned
Fei alles wohr - dess alles glabsd ned
Wergli wohr - Do langsd dä blos ons Hirn


Du konnsd kaan Schridd mehr machn, s'werd regisdrierd un archivierd
A jeder Schiess, den'sd fohrn lässd, digidal analysierd
Als ob dess ned scho gnuuch wär, so schliessd siech no dä Greis
Mier lossns ned bloß zu, gehm selber alles breis

Di Doodnsammler wissen alles, wossd gessn hosd un wie dei Schduhl heid wor
Irchndwann kennans dann Gedangn lesn, schreibm dä wiesd zu lebm hosd vor

Glabsdersnaa - Dinger gibbds, di gibbds ned
Glabsdersnaa - dess wennsd heersd, dess baggsd ned
Fei alles wohr - dess alles glabsd ned
Wergli wohr - Do langsd dä blos ons Hirn

Dess iss alles iss so unglaublich, do kummsd ned selber drauf
So schräch, gnadnlos danebm, do hauds dä voll denn Vochl naus
Dess kommer kaam erzähln, des nimmd dä kaaner ab
Dädsd ders selbst erfindn, no fiererdns diech sofodd ab

Biss mer dem all'n auf di Schlichn kummd, maahnd mer eh, ess iss bloß draamd,
Irchndwann dann a bees Erwachn, obber no hamm die scho voll abgrahmd

Glabsdersnaa - Dinger gibbds, di gibbds ned
Glabsdersnaa - dess wennsd heersd, dess baggsd ned
Fei alles wohr - dess alles glabsd ned
Wergli wohr - Do langsd dä blos ons Hirn
Track Name: Dess dudd guud
Dess dudd guud Text und Musik: Wolfgang Mai


Di erschdn Sunnastrohln om früa Morchn
Nebl ieber dä drächn Rechnids schwebd
Strohlends Weiß, wenn Kerschbaamer blüa
Bunds Laub in der Herbsdsunna leuchd
Glaana Schdörch im Nesd aufm Schornschdaa
Un di Alden, die zum Fröschfanga flieng
Amselzwidschern om dämmerichn Morchn
So schee, dassd Nachd freiwilli weichd
Spiersd du dess ned a? Mergsd nedd, wie guud dess dudd?
Mach amoll die Aung zu - un spier, dess dudd guud!

Dä erschde Schlugg vo am frisch zapfdn Bier
A Broodzeid under Baamer auf der Berchkerwa
Schdingerdä Käs, aufgschniddna Reddich
Der Biss in die Broodworschd, a haas Sauergraud
In Budder goldbraun grösda Grieberli
Glees midd Bohnakern, gnaggich griener Salood
A resch baggns Kärpfla, an Willi danooch
An Zwädschgnkuung, frisch brühder Kaffee
Spiersd du dess ned a? Mergsd nedd, wie guud dess dudd?
Mach amoll die Aung zu - un spier, dess dudd guud!

Der Bligg vo Marloffstaa nieber nooch Nemberch
Bunda Drachn, die dordn in Herbsdhimml steing
Im Aufsessdohl zur Kuchermühl wandern
Frischa Mornglufd beim Schbordln im Steggerleswald
Rosa Wuchd vo Magnoliablüdn
Gelba Sunnabluhmfelder im warma Ohmndlichd
Erschda Maiglöggli nooch am strenga Winder
Nooch am Gwidder glora, kühla, würzia Lufd
Spiersd du dess ned a? Mergst Du wie guud dess dudd?
Mach doch amoll die Aung zu - un spier, dess dudd guud!

Dess Schdrohln in die Aung vo meim Schädsla
Wenns am Sundoochmorng amoll ausgschloofn hodd
Midd di Freind musiziern bei am guudn Glos Wein
Im Bedd lieng un "Sambesi" vom Wolfgang Bugg heern
Gluggsn un Lachn vo di glaan Fradzn
Ihri Froong, ihr Schdauna, ihr Unschuld un Ehrlichkeid
Siech di Händ beim Eischlofn haldn
Beim Aufwachn den andern widder neber siech spiern
Spiersd du dess ned a? Mergst Du wie guud dess dudd?
Mach amoll die Aung zu - ach, dess dudd so guud!
Track Name: Dahamm
Dahamm Text und Musik: Wolfgang Mai


Wenn miech ahner frächd, wo kummsd du nern her?
Und iech sooch: aus Erlang, ernd i Bligge, öd un leer
Wassd scho, sooch i dann, bei Nermberch do nehmdro
In dä frängischn Bamba zwischer Buhmraid, Buggnhof un Dennerloh
Kaum ahner kennds, kaum ahner waas, wo der glaa Weiler lichd
Gäbs di Firma un di Uni nedd, daucherds gornedd auf in dä Weldgschichd
Erlang, Unbekannda, mier zwaa g'hörn zamm
Iech bin dä Wolfgang, un do bin iech dahamm

Erlang ghörd zu Bayern, a Bayer iss mer obber nedd
Mer iss zwor wer, dess "Mier san mier" loss mer bescheidn wech
Zwischer Breissn un Schdudendn underm Frangnhimmlszeld
Driffsd dollerande Menschn, offne Bürcher vo Weld
Amoll ahn dreffm, der wo wergli vo do kummd, iss olles andre als driviol
Under alla Nadsiona sinn di Erlanger Aborigines ganz glor in dä Minderzohl
Erlang, mei bunds Erlang, mier zwaa g'hörn zamm
Iech bin dä Wolfgang, un do bin iech dahamm

Langwahli, zu rechdwingli, ohne Highlight, ohne Chic
No jo, manchmoll endbubbd si Scheenheid hald erschd aufn zweidn Bligg
Gemässichd iss ess Glima, unschbegdagulär, massd mild
Unwedder ziehng nooch Nemberch nieber - immer widder a scheens Bild!
Wenn's in dä Fern rummsd, grachd, schüdd, schebberd, dassd maansd, di Weld brichd zamm
Deng iech, wi guud, wennsd ab vom Schuss liggsd, nehmdro iss a dahamm
Erlang, Unscheinbora, mier zwaa g'hörn zamm
Iech bin dä Wolfgang, un do bin iech dahamm

Woss bei di Fisch dä Lachs, iss beim Mensch dä Frangnschdamm
Eschd ziechd siss in di Weld naus, doch schnell ziechsd alla widder hamm
Heid waas mer, dess iss Genedigg, a DNA midd mudierdm Stügg
Dess ahm befilld, kehr widder dordhie, woosd gschlübfd bisd, zurügg
Do siggsd dann ahn a ganz Johr lang nedd, doch ess gibbd an sichern Ord
Sovill iss gwies, aufm Berch drohm driffsd nann, wall wennsd aan dreffn willsd, dann dord
Erlang, mei Erlang, mier zwaa g'hörn zamm
Iech bin dä Wolfgang, un do bin iech dahamm

Ieberleemsraum fier bedrohda Ordn, zum Baischbill Menschn, die an Haigaing fohrn
Fußgängerzona gibbds zwor, doch Zwaafüssler hamm do nix verlorn
Beim Schlendern, beim Eikaafm, nirchnds konnsd dä sicher sei
Do dengsd nix Bees, scho glingld ahner, ziechd midd am Afferzohn verbai
Mancha Rodler rumbln, villeichd leemsmüd, obber sicher nedd ned gans dichd
Verkehrdrum nei in Einbohnstroßn, nachds a gern moll ohna Lichd
Erlang, mei Erlang, mier zwaa g'hörn zamm
Iech bin dä Wolfgang, un do bin iech dahamm

Gschaida, gluucha Menschn hamm scho immer glebbd dodrohm
Dä Faierbochs Ludwich, Rüggerd, Fichde un dä Ohm
A fier Loddar "di Leuchdn" Maddhäus wor hier de Anschdoos fier sei Leem
Manchmoll konnsd a denn Heiner, wassd scho, denn vo Bierer sehng
Doch die sann alla nedd gor so wichdi, fier miech, do zähld alla
Dä gressde Mensch aus Erlang wor mei Oma seelich, ess Ermann's Grederla
Erlang, mei Erlang, mier zwaa g'hörn zamm
Iech bin dä Wolfgang, un do bin iech dahamm

Kummsd vo Nemberch auf dä Audobohn, siggsd di Gipfl vom Burchberch
Bücherbacher Skyline, Kerchdürm, n Schlood vo di Schaddwerch
A komischs blaus Hochhaus, in Wosserdurm bei Marloffstaa
Und jedesmal on Pfingsdn ess Riererrad auf dä Berchkerwa
Verbai om Dechser, woosd a als Laie Algnwachsdum schdudiern kann
Durch di Rechnidswiesn, bei di Wasserrädli waas iech dann: iech bin dahamm
Erlang, mei Mauerblümmla, mier zwaa g'hörn zamm
Iech bin dä Wolfgang, un do bin iech dahamm
Erlang, mei Scheena, mier zwaa g'hörn zamm
Iech bin dä Wolfgang, un do bin iech dahamm
Track Name: Ess wahre Leem
Ess wahre Leem Text und Musik: Wolfgang Mai


Du reechsd di auf, du flibbsd aus weecher jedn Muggerschiess
Dai Bluddrugg steichd, dai Buls der joochd, dess dudd ka guud, sovill is gwies
Du maansd di Weld will alles vo dä, du spierst di bloss, wennsd beinoh bladsd
Ranglotzn unn ned gleggern iss dei Lieblingsglaubnssadds
Du willsd alles, immä, ieberoll und wenns gehd sofodd
Ohne Sinn und Zill, ohne Verschdand, immä schnellä gehd der Drodd

Ess wahre Lehm diggt andersch, dess konnsd ned so wiesd willsd hibieng
Der Fluss fliessd a ned schneller, a wennsd mahnsd, du konnsd nan schiehm

Es Groos wächsd fei ned schnellä, a wennsd nu so lang droo ziechsd
Dä Reeng fälld ned in Himml nauf, du bisd ned schnellä als ess Lichd
Dä Boch fliessd ned nooch ohm, odder schdur grodaus
Er bassd siech on seim Boden o, un er waachd di Schdaaner aus
Di Blumma wächsd dem Lichd entgehng, machd in der Wärm iehr Blüdn frai
Iech glaab, wenn du a Blumma wärsd, wachsersd Du inn Bodn nai

Ess echde Lehm diggt andersch, dess konnsd ned so wiesd willsd hibieng
Der Fluss fliessd a ned schneller, a wennsd so dussd, als könnsd nan schiehm

Du hängsd di nai, du gibbsd alles, schdramblsd bis nix mehr gehd
Obber bevor's di umschausd, hauds di um - nocherd schausd rechd bleed
Du broahlsd, du hosd di Züchl in der Händ und lengsd Dein Wohng allaans
Dabei hosd diech doch schon längsd verfohrn, scheissd in di Hosn vor lauder Angsd

Ess wahre Lehm diggt andersch, dess konnsd ned so wiesd willsd hibieng
Der Fluss fliessd a ned schneller, a wennsd der einbildsd, du konnsd nan schiehm

Wassd ned wozu dess alles guud sei soll, wassd ned wohie, woher
Dess Vakuum im Hirn, dess machd dä Angsd, im Kobf drinna alles öd un leer
Di Leer, di überdöhnsd mid Ärberd, Hedzerei
Bausd der an Potemkin fier dei Seel, doch dei Kaiser is a Naggedei

Ess wahre Lehm diggt andersch, dess konnsd ned so wiesd willsd hibieng
Der Fluss fliessd a ned schneller, awennsd mahnsd, du konnsd nan schiebm
Die Naduur, di hodd iehrn Rhydhmus und dei Körber is Naduur
Doran konnsd du nix verändern, a weensd di streibsd in aaner Dour
Track Name: S'ledsda Wodd iss nonni gschbrochn
S'ledsda Wodd iss nonni gschbrochn Text und Musik: Wolfgang Mai


Iech meecherd wissn, woheer mier kumma
Un wohie die Reisn gehd
Wo dro nern bloß kommer sich haldn?
Weer sochd aam, woss di Wohrheid is?
Di masdn Froong verhalln im Dungl
Ohne Muggs un Widerhall
Un wemmer moll a Andword findn
Daung lauder naie Froochn auf

Ahns, dess is sicher, sterm missmer alla,
Do wunderds miech, dass mer nu frehli sinn
Di ahn, di lebm und sterbm im Elend
Di andern, dennern fehlds on nix
Wohie mid Leid, Schmärds, Nood un Drauer
Wo bleibd woss guud wor un so schee?
Dess konn mer doch ned stea lossn,
Wo bleibd do di Gerchdichkeid?

Mier flieng durchs All auf am winnzing Blanedn
Der irchndwann in'd Sunna sterzd
Ess Lichd, di Zeid, di Weld, ess Leem
Verglühd, verbrennd im Faierboll
Underschiedslos werd all bladdgmachd -
Un dess soll's dann woll gwesn sei?
Ess ledsde Wodd iss nonni gschbrochn
Un dä Münchhausen is a Lügngschichd...
Track Name: Wennsd amoll fällsd
Wennsd amoll fällsd Text: Wolfgang Mai
Musik: Hans-Jürgen Friedrich (Refrä)
Wolfgang Mai (Dä Resd)

Hobb öfder gmahnd, dess iss di Fraa fiers Lebm
Die un ka andra hodds dann fier miech gehm
Wie's kumma mussd, Lufdschlösser sterzn ei
Hobb gmahnd dess Elend, dess gehd nie verbai

Kaum hobbi di Lizenz zum Lufdschlösserbaua abgehm
Scho stehds in dä Dür, di Fraa fiers Leem

A wenns nu so weh dudd
Wennsd amoll fällsd
S'Lebm zeichd där an Weech
A wenn's d'ers kaum aushäldsd
Mer waas vorher nie wozu woss guud iss
Schdeh auf un geh weider

Iech hobb immer glabbd, Freind sinn fiers Lebm
Hobb mi voll neighängd, iech hobb alles gehm
Bis i irchndwann gschnalld hobb, die nudsn diech aus
Solangsd schee dussd, dennans grinsn, wenn nedd, nocherd haua's diech naus

Doch glaab mer, in der Nood erkennsd, wer zu dä schdehd
Dä echde Freind bleibd, dä falsche gehd

A wenns nu so weh dudd
Wennsd amoll fällsd
S'Lebm zeichd där’n Weech
A wenn's d'ers kaum aushäldsd
Mer waas vorher nie wozu's guud iss
Schdeh auf un geh weider

S'Lebm gehd grumma Weech, s'leffd seldn grodaus
Do hossd ders fasd ferdich, no fällds dä zamm, dai Kaddnhaus
Wenn mer heid sowoss bassierd, no ieberleech iech gans schdill
Ob mer ess Leem damidd villeichd nedd doch woss Guuds will

Wie der Wind, der wehd, a Schdurm, der blässd, scheinbor blind
Wie a Bach, der mäanderd, un doch sein Weech ins Meer find

A wenns nu so weh dudd
Wennsd amoll fällsd
S'Lebm zeichd der an Weech
A wenn's d'ers kaum aushäldsd
Mer waas vorher nie wozu woss guud iss
Schdeh auf un geh weider